كـن مـرن و " اكسر الحاجز "
عايز تعمل شبكة..بدايتك هنا
اى حد جديد اول مره يقرا عن الوايرلس
يعنى مثلا اول ما تدخل تسمع عن جهاز بيبث مسافة 3 كيلو
ومسافات كبيره وارقام غريبه
بتبقى عايز تعمل شبكه تغطى المحافظه كلها
لكن الموضوع مختلف شويه
الشبكات نوعين .. نوع موجه يعنى فى اتجاه واحد بس
ونوع تانى دائرى ( اومنى )
الموجه ده بنقدر نوصل بيه لمسافات كبيره جدا توصل لـ 20 كيلو واكتر على حسب الاجهزه المستخدمه
اما النوع التانى بيكون فى رينج 2 كيلو او 3 كيلو
وده بيختلف حسب نوع الانتنا ( الايريل ) والجهاز اللى بيبث
لكن فى قانون مهم جدا هو الاساس
ان لازم يكون فى خط روؤيه مباشر بين الارسال والاستقبال
بمعنى انك تقدر تشوفه بعينك وما يكونش فى اى عائق فى النص ( برج مثلا )
والاجهزه اللى ممكن تبث 20 كيلو لو فى عوائق ممكن حتى لا تصل لـ 500 متر
طبعا شغلنا كله على الدائرى .. وشغل الموجه قليل بنستخدمه مثلا فى نقل الانترنت من مدينه لقريه جنبها وبعدين نرجع نوزع دائرى بسيستم تانى منفصل
طيب جميل لحد كده
اولا علشان تفكر تعمل شبكه لازم تحدد :-
1
المسافه
اللى عايز تغطيها
هنا كل واحد له راى على حسب المكان اللى انت فيه
لو انت فى مدينه كبيره ممكن تبقى عايز تغطيها كلها .. وده مش هيفيدك فى حاجه
لان اكيد فى شبكات تانيه كتير فى المنطقه
ولو عميل بعيد حصل عنده مشكله هتبقى المشكله الحقيقه انك تروح له
ده غير ان التكلفه هتكون كبيره
لو انت فى مدينه مثلا وعايز تربط قرى جنبك ده ممكن فتعمل سيستم يرمى معاك مسافه 3 كيلو دائرى وتستقبل باجهزه محترمه
المسافه هى اهم حاجه لازم تعرفها ونقدر نقسمها لـ 3 رينجات
اقل من 1000 متر
1000إلى 2000 متر
اكتر من 2500 متر
المسافات طبعا بتختلف من مكان لمكان على حسب العوائق وطبيعة المكان
لكن
دى رينجات نقدر نختار لكل رينج منهم نوع من الاجهزه الاشهر فى السوق
2
الميزانيه
لازم تحدد ميزانيتك كام
ولو الميزانيه مفتوحه مش شرط تجيب حاجه تغطى مسافات كبيره جدا وانت مش محتاجها
كفايه انك تستخدم الجهاز المناسب وتوفر فلوسك
ومفيش حاجه اسمها احسن حاجه
فى حاجه اسمها انا عايز اعمل شبكه تغطى معايا كذا وفيها شروط كذا وبعد كده تقرر احسن جهاز بالنسبه لك
3
عدد العملاء
كل اكسس بيتحمل عدد عملاء معين
يعنى ممكن 20 او 50 عميل اونلاين على حسب نوع الجهاز
وده عدد كويس جدا لاى شبكه جديده
--------------------------------------------------------------------------
اشهر اكسسات الارسال :-
( بالترتيب من الارخص للاغلى والاعلى مواصفات )
ايرليف 5460
اكسس ممتاز جدا وسعره معقول واشارته عاليه
الاكسس بيجى بانتنا 2 دى بى يغطى الرينج الاول كمسافه
مناسب جدا لاى حد محتاج انه يجرب شغل الوايرلس وبينجه مستقر
باور الاكسس بيصل إلى 26 دى بى ام .. ما يعادل 400 ملى وات
الاكسس اندور يعنى لا يتحمل الظروف الجويه فلازم نحميه فى علبه
واخوه الكبير اكسس بافلو g54 لكن غير متوفر فى السوق
بيكو ستيشن 2 أتش بى
اكسس ممتاز جدا
باوره 1000 ملى وات
حجمه صغير جدا وادائه ممتاز
مسافة البث فى الرينج التانى
اوت دور .. يعنى يتحمل الامطار والشمس والظروف الجويه
Bullet 2hp + hyperlink
من اشهر الاكسسات الموجوده فى السوق
اشارته عاليه جدا خصوصا مع الانتنا الهايبر لينك 15 دى بى
بيجى منفصل من غير انتنا وممكن تركيب عليه اى انتنا اوت دور زى التى بى لينك 15 دى بى او الهايبر لينك
اوت دور يتحمل جميع الظروف الجويه ( نفس الشركه المنتجه البيكو ستيشن )
RouterStation PRO + XR2
RouterBoard + XR2
دول سيستمين مختلفين
الاول روتر استيشن وهى عباره عن بورده من شركة ubiquiti المنتجه للبوليت والبيكو
وكرت xr2 عباره عن كرت مينى بى اى سى بيركب فى البورده
اما الروتر بورد فهى بورده من شركه ميكروتيك وايضا بيركب عليها كرت مينى بى اى سى واشهرهم xr2
مميزاتهم ان ممكن تركيب اكتر من كرت عليهم وتوصل اكتر من انتنا
يعنى ممكن تركب كرتين وكل كرت بيوصل فى انتنا 180 درجه
فتقدر تعمل سيستمين يغطوا مسافه اكبر واشاره اعلى وافضل استقرار
--------------------------------------------------------------------------------
الاستقبال
الاستقبال غالبا بيكون باكسس تى بى لينك 500g او 501
وده لانه ارخص اكسس فى السوق واداءه كويس جدا
فى المسافات البعيده لما تكون الاشاره ضعيفه ممكن تستقبل باكسس ايرليف 5460
وطبعا تقدر توصل لاكتر من عميل على نفس الاكسس بانك تشترى سويتش
الافضل طبعا انك توصل لأكتر من عميل على كل اكسس لان بكده بتخف الضغط عن الرئيسى والمشاكل بتقل
----------------------------------------------------------
بالنسبه لكروت الوايرلس
لا انصح باستخدامها لان مشاكلها ( او مشاكل الجهاز ) كتير
واى مشكله فى الويندوز مش هنقدر نعرف العيب من ايه بالظبط
الميزه الوحيده فى الكرت ان سعره رخيص
بتجيب كرت ويتم عمل تطويله للانتنا فى حدود 10 متر
وطبعا دى بتعمل فقد فى الاشاره
اما الاكسس بنرفعوا بالانتنا بتاعته فوق اعلى مكان ونحميه فى علبه ونوصله كبل كهربا ونت وخلاص
وتقدر توصل من الاكسس لاكتر من عميل .. اما الكرت طبعا لاء
-------------------------------------------------------------
نظام الربيتر
ربيتر يعنى اكسس يستقبل الاشاره ويرددها تانى وتستقبل منه باكسس تانى
النظام ده للاسف مع الاجهزه المستخدمه زى التى بى لينك هو نظام فاشل
والاداء بيكون سئ ومش مستقر غالبا
الحل الافضل انك تستقبل باكسس وترجع تبث باكسس تانى
وبكده تبث مسافات كبيره وباداء مستقر من غير ما تضغط على الشبكه الرئيسيه
-------------------------------------------------------------
نصائح
1- عند تركيب جهاز الارسال يراعى تركيبه فى مكان عالى يرى جميع الاسطح
2- محاوله تفادى العوائق مثل عماره عاليه مثلا
3- للحصول على افضل ادء للاستقبال حاول تركب جهاز العميل فى مكان مساوى فى الارتفاع لجهاز الارسال بحيث يراه رؤيه واضحه للحصول على نتائج افضل
4 - الإشارة اللاسلكية هي موجات كهرومغناطيسية تسير في الهواء و لا تتأثر فقط بالمعوقات الكبيرة فربما يحتوي الوسط التي تنتشر فيه علي غبار أو أدخنة فتقوم كل ذرة من ذرات هذه المواد بالتأثير علي هذه حزم هذه الإشارة فتارة تكسرها أو تعكسها و هذا يسمي بـ scattering أو التناثر
غرد لأصحابك في تويتر :) غرد
شارك عبر جوجل بلس ;)
شير علي الفيس بوك ( )
Follow @كونترول بى
المشاركات
ليست هناك تعليقات :